بطل تعمل DoS لفريقك
إزاي تتجنب انهاك فريقك من غير ما تقصد
مقدمة:
DoS (Denial of Service) ده هجوم بيقوم على إننا نغرق "مصدر" أو "خدمة" بكمية طلبات وهمية أو ملهاش معنى لدرجة إنها تتشل. تخيّل كده إن فجأة موقع إنترنت بيجيله سيل من الطلبات الفاضية لدرجة إنه مش عارف يتعامل مع الطلبات الحقيقية من المستخدمين. يا إما بيبقى بطيء جداً، أو بيرفض يفتح أصلاً للمستخدمين الحقيقيين، أو بيقع خالص، وبالتالي مبيبقاش ليه لازمة.
في عالم التكنولوجيا، ممكن تعمل كده بأنك تظبط (job) تفضل تطلب "مصدر" معين عدد ضخم جداً من المرات في نفس الوقت. ده بيخلي المصدر ده يتجاوز طاقته القصوى (سواء بالزيادة الرأسية أو الأفقية) وبيبطّأ الدنيا، وبيزود الوقت اللي بياخده عشان يستجيب. وفي الآخر، بيتقف خالص عن الاستجابة أو بيبقى غير مستخدم للمستخدمين الحقيقيين.
إزاي تعمل DoS للبني آدمين:
الهجوم ده مش على السوفت وير والسيرفرات بس؛ ده بينطبق على البشر كمان. كلنا عندنا طاقة محدودة ووقت محدود. لو عايز تعمل "DoS" لحد، الفكرة إنك تغرقه بطلبات ومهام كتيرة لدرجة إن وقته وقدرته الذهنية تتملي على الآخر. لما ده بيحصل، بيبدأ يتأخر في المهام المهمة، ومبيعرفش يستجيب للطلبات الجديدة، وبيحصله "حرقان" (burnout) بسرعة.
إزاي تعمل DoS لفريقك بالغلط (من غير ما تاخد بالك):
أكيد دلوقتي فهمت أنا رايح فين بالكلام ده. إنك تعمل "DoS" لفريقك ممكن يحصل بسهولة جداً، حتى من غير ما تكون قاصد. زمان، الطرق الشائعة اللي كنا ممكن نرهق بيها زمايلنا من غير قصد كانت:
* تسأل زمايلك عن كل تفصيلة صغيرة قبل ما تحاول تدور على الإجابة بنفسك.
* تحدد عدد كبير جداً من الميتنجز (الاجتماعات) اللي ملهاش لازمة، بحجة إنكم "سكرام جامدين جدا".
* تبعّت رسايل طويلة جداً عن حاجة كان ممكن تتشرح في سطر أو اتنين بالكتير.
بس دلوقتي، فيه نوع جديد من هجمات الـ "DoS" بدأ يظهر، خصوصاً مع ظهور أدوات الذكاء الاصطناعي (AI):
* إنك ترفع Pull Requests (طلبات مراجعة الكود) كلها معموالة بالـ AI من غير ما تراجعها بنفسك صح.
* إنك تولّد أجزاء كود كبيرة ومعقدة جداً لدرجة إن قراءتها وصيانتها ومراجعتها تبقى كابوس.
* إنك تكتب رسايل طويلة متولّدة بالـ AI تبان احترافية بس ناقصها لمستك الشخصية ووضوحك.
الأفعال دي ممكن تستهلك طاقة فريقك بشكل كبير جداً. هيخلّيهم ينتجوا أقل، وهيخلّيهم أقل قدرة على تحمل طلباتك في المستقبل، والتأثير السلبي ده هيرجع عليك في الآخر برضه.
خليك مسؤول:
أنا مش بحاول اكون "منافق" هنا وبقولك بطل تستخدم الـ AI في شغلك! أنا بستخدم الـ AI في شغلي. قصدي هو إنك تستخدمه بمسؤولية وتفضل أنت اللي ماسك الدريكسيون. متسلمش دماغك وحكمك للـ AI. والأهم من كل ده، متلخبطش بين "إنتاج كود أكتر في وقت أقل" وبين "الإنتاجية الحقيقية". الإنتاجية مزيج من الجودة والكمية. لو خسرت الجودة، أنت ببساطة بتنتج كمية كبيرة جداً من الكود الوحش بسرعة.
بلاش تعمل DoS لفريقك وحاول تستخدم الأدوات القوية الجديدة دي بأفضل وأكثر طريقة ممكنة ومسؤولة.
المقالة الأصلية:
